ខ្សែបម្រើសញ្ជាតិព័រទុយហ្គាល់ Bruno Fernandes ត្រូវបានតែងតាំងជាប្រធានក្រុមថ្មីរបស់ Manchester United ដោយក្លឹបបានប្រកាសកាលពីថ្ងៃព្រហស្បតិ៍។ 

កីឡាករវ័យ២៨ឆ្នាំនឹងជំនួសតំណែងខ្សែការពារ Harry Maguire ដែលត្រូវបានដកចេញពីតំណែងជាប្រធានក្រុមដោយលោក Erik ten Hag បន្ទាប់ពី Harry Maguire មិនបានជាប់ឈ្មោះក្នុងជម្រើសក្រុមដំបូង។

Fernandes ដែលរកបាន៦៤គ្រាប់​ និង៥៤​ assists ក្នុង១៨៥ប្រកួតសម្រាប់ក្លឹប នៅក្នុងការប្រកួតទាំងអស់នោះ បានក្លាយជាប្រធានក្រុមនៅពេលអវត្តមានរបស់ Maguire ដែលបានចំណាយពេលច្រើនកាលរដូវកាលមុននៅលើកៅអីបំរុង ឬរងរបួស។

United នឹងធ្វើដំណើរបន្ទាប់ទៀត ទៅកាន់សហរដ្ឋអាមេរិក ជាកន្លែងដែលពួកគេនឹងជួប Arsenal, Wrexham, Real Madrid និង Borussia Dortmund ក្នុងការប្រកួតមិត្តភាពមុនបើករដូវកាលថ្មី៕