ក្លិប Borussia Dortmund ជិតនឹងសម្រេចកិច្ចព្រមព្រៀង  ដើម្បីនាំយកខ្សែប្រយុទ្ធ Fabio Silva របស់ក្លិប Wolves ដោយកីឡាកររូបនេះ អាចនឹងបង្ហាញខ្លួនជាលើកដំបូង  ក្នុងការប្រកួតទល់នឹងក្រុម Union Berlin។

យោងតាមប្រភពពីសារព័ត៌មាន Sky Sport ក្លិប Dortmund បានបញ្ចប់កិច្ចព្រមព្រៀងដើម្បីចុះហត្ថលេខាលើ Silva ពីក្លិប Wolves ក្នុងតម្លៃ ២២.៥ លានអឺរ៉ូ  បូកនឹងប្រាក់បន្ថែមចំនួន ៤លានអឺរ៉ូទៀត ដែលធ្វើឱ្យតម្លៃសរុបកើនដល់ជិត ២៧លានអឺរ៉ូ ។ ខ្សែប្រយុទ្ធសញ្ជាតិព័រទុយហ្គាល់រូបនេះ បានយល់ព្រមលក្ខខណ្ឌផ្ទាល់ខ្លួនរួចរាល់ហើយ ហើយនឹងត្រូវធ្វើតេស្តសុខភាពនៅថ្ងៃព្រហស្បតិ៍ ដោយក្លិប Dortmund កំពុងប្រញាប់ប្រញាល់ដើម្បីឱ្យកីឡាកររូបនេះ អាចចូលលេងបានសម្រាប់ការប្រកួត Bundesliga របស់ពួកគេទល់នឹងក្រុម Union Berlin នៅថ្ងៃអាទិត្យ។

Silva បានលាគ្នាជាមួយមិត្តរួមក្រុមរបស់គាត់នៅ Wolves បន្ទាប់ពីការប្រកួត Carabao Cup របស់ពួកគេឈ្នះក្រុម West Ham កាលពីយប់ថ្ងៃអង្គារ បន្ទាប់ពីមិនត្រូវបានបញ្ចូលក្នុងក្រុមសម្រាប់ការប្រកួតនេះ។ ក្លិប Roma និង AC Milan ក៏បានបង្ហាញចំណាប់អារម្មណ៍ផងដែរ ប៉ុន្តែក្លិប Dortmund បានធ្វើសកម្មភាពយ៉ាងលឿនដើម្បីបិទបញ្ចប់ការផ្ទេរនេះ។ 

Silva គ្រោងនឹងទៅដល់ប្រទេសអាល្លឺម៉ង់នៅថ្ងៃព្រហស្បតិ៍ដើម្បីបញ្ចប់ការពិនិត្យសុខភាព និងឯកសារចុងក្រោយ។ ប្រសិនបើអ្វីៗដំណើរការទៅដោយរលូន គាត់នឹងត្រូវបានចុះឈ្មោះទាន់ពេលវេលាសម្រាប់ការប្រកួត Bundesliga របស់ក្លិប Dortmund ទល់នឹងក្រុម Union Berlin នៅចុងសប្តាហ៍នេះ៕