Barcelona បានឈានដល់កិច្ចព្រមព្រៀងជាមួយ​Manchester City ដើម្បីចុះហត្ថលេខាលើកីឡាករ Ilkay Gundogan ដោយឥតគិតថ្លៃ នៅពេលដែលកិច្ចសន្យារបស់គាត់ផុតកំណត់ នៅថ្ងៃទី៣០ ខែមិថុនា នេះបើយោងតាមប្រភពដែលបានបញ្ជាក់ប្រាប់ ESPN ។

Gundogan វ័យ៣២ឆ្នាំ បានយល់ព្រមលើកិច្ចសន្យាដែលមានរយៈពេល២ឆ្នាំ ជាមួយ Barca ជាមួយនឹងជម្រើសសម្រាប់ឆ្នាំទី៣​ ដោយបដិសេធបន្តការស្នាក់នៅរយៈពេល ៧រដូវកាលរបស់គាត់ជាមួយ​ City ក៏ដូចជាសំណើពី​ Arsenal និងក្លឹបនៅអារ៉ាប៊ីសាអូឌីតផងដែរ។ 

បញ្ហាហិរញ្ញវត្ថុរបស់ Barcelona ធ្វើឱ្យពួកគេបានស្វែងរកទីផ្សារកីឡាករដែលឥតគិតថ្លៃ ហើយនៅក្នុងខែមីនា ESPN បានទម្លាយថា Barca បានកំពុងពិភាក្សាជាមួយកីឡាករអន្តរជាតិរបស់អាល្លឺម៉ង់រូបនេះ។

Andreas Christensen និង Franck Kessie ទាំងពីរបានផ្លាស់ប្តូរមកដោយឥតគិតថ្លៃកាលពីរដូវក្តៅមុន ហើយខ្សែការពារ Inigo Martinez ក៏គ្រោងនឹងចូលរួមជាមួយ Barca ផងដែរបន្ទាប់ពីកិច្ចសន្យារបស់គាត់ជាមួយ Athletic Club ផុតកំណត់ក្នុងខែនេះផងដែរ៕