តាមប្រភពបានប្រាប់ ESPN ថា Real Madrid បានត្រៀមខ្លួនរួចរាល់ទៅហើយ ក្នុងការដាក់តម្លៃសម្រាប់ Kylian Mbappe នៅរដូវក្តៅនេះ ជាជាងរង់ចាំការចុះហត្ថលេខាលើគាត់ដោយឥតគិតថ្លៃ នៅពេលដែលកិច្ចសន្យារបស់គាត់ជាមួយ​ Paris Saint-Germain នឹងផុតកំណត់នៅរដូវកាលក្រោយ។

តាមប្រភពដដែលនេះ បានប្រាប់ ESPN ថា PSG នឹងសុខចិត្តទទួលយកសំណើដែលមានតម្លៃប្រហែល១៥០លានអឺរ៉ូ (១៦១.៥លានដុល្លារ) សម្រាប់ Mbappe នៅរដូវក្តៅនេះ ដើម្បីជៀសវាងការបាត់បង់កីឡាកររូបនេះ ដោយឥតគិតថ្លៃនៅឆ្នាំក្រោយ។

Mbappe បានទម្លាយសារមួយតាមរយៈ AFP កាលពីថ្ងៃអង្គារដែលសរសេរថា "ក្រុមប្រឹក្សាភិបាលត្រូវបានជូនដំណឹងតាំងពីថ្ងៃទី១៥ ខែកក្កដា ឆ្នាំ២០២២ អំពីការសម្រេចចិត្តរបស់ខ្ញុំដែលមិនបន្តកិច្ចសន្យាលើសពីឆ្នាំ២០២៤ ហើយលិខិតដែលបានផ្ញើនោះ គឺគ្រាន់តែចង់បញ្ជាក់ពីអ្វីដែលខ្ញុំបានប្រាប់ពួកគេរួចទៅហើយ"៕