ខ្សែការពារ Jules Kounde របស់ក្រុមអ្នកមានបុណ្យ FC Barcelona បានស្នើរសុំចាកចេញពីក្លិបនៅរដូវក្តៅខាងមុខ ដោយសាររូបគេចង់លេងជាខ្សែការពារកណ្តាលពេញលេញ តែយ៉ាងណាក៏ដោយក្លិបមិនអាចបោះបង់រូបគេដោយស្រួលៗនោះឡើយ។

Kounde បានស្នើធ្វើការចាកចេញពីកីឡដ្ឋាន Camp Nou ខណៈដែលគាត់ចង់លេងនៅកណ្តាល ជំនួសតំណែងខ្សែការពារស្តាំ ដែលអ្នកចាត់ការ Xavi បានដាក់គាត់ជាញឹកញយ។ នៅ La Liga Kounde បានលេងនៅខាងស្តាំ ១៨ដង និងជាខ្សែការពារកណ្តាលត្រឹម ៩ដងប៉ុណ្ណោះ ហើយនេះជាមូលហេតុតែមួយគត់ដែលធ្វើឲ្យខ្សែការពារសញ្ជាតិបារាំងរូបនេះ មិនពេញចិត្តទាល់តែសោះ។

យ៉ាងណាក្តី ក្លិប Barcelona នឹងមិនងាយបោះបង់ Kounde ចោលនោះឡើយ ក្រោមមូលហេតុដែលក្លិបបានចំណាយប្រាក់ប្រមាណ ៦០លានអឺរ៉ូ ឬប្រមាណ ៥១លានផោន សម្រាប់ការនាំយក Kounde ពីក្លិប Sevilla មកកាលពីរដូវកាលមុន ហើយបានបង្ហាញខ្លួនរហូតដល់ទៅ ៣៨ប្រកួត សម្រាប់រដូវកាល ២០២២-២០២៣។ ដូចនេះ ការលែងដៃ Kounde ជារឿងដែល Barcelona មិនចង់ជួបប្រទះ លុះត្រាតែមានការចរចាថ្លៃខ្ពស់ចាប់ពី ៧០ លានផោនឡើង ទើបក្រុមរបស់លោក Xavi អាចសម្រេចពិចារណា៕