ល្បុក្កតោ សង្ឃឹមប្រជែងបានមេដាយមាស ពី ៧ ទៅ ១០ គ្រឿង នាស៊ីហ្គេម ឆ្នាំ២០២៣

Mar 01, 2022

ល្បុក្កតោ ជាក្បាច់គុនរបស់ដូនតាខ្មែរ ពេលនេះ ក្បាច់គុន ដ៏ចំណាស់នេះ ត្រូវបានបញ្ចូល ទៅក្នុងកម្មវិធីហ្វឹកហាត់ របស់កងយោធពលខេមរភូមិន្ទ ។

ជាមួយគ្នានេះ ក្បាច់គុនដ៏ចំណាស់នេះ ត្រូវបានអភិរក្សឡើងវិញ ដោយបណ្ដាខេត្ត គ្រឹះស្ថានសិក្សានានា បើកជាក្លិប ដើម្បីបង្ហាត់ដល់សិស្សរបស់ខ្លួន។ ជាមួយនឹងការរីក ចម្រើន នៅក្នុងប្រទេស ល្បុក្កតោ ត្រូវបានពង្រីក និងផ្សព្វផ្សាយ ដល់បណ្ដាប្រទេសនានា នៅក្នុងតំបន់ មិនតែប៉ុណ្ណោះ ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ដែលកម្ពុជា ធ្វើជាម្ចាស់ផ្ទះនោះ ល្បុក្កតោ ត្រូវបានដាក់ឲ្យប្រកួត ជាលើកដំបូង។

លោក អ៊ួ តារា ដែលជាអគ្គលេខាធិការរង សហព័ន្ធកីឡាគុនល្បុក្កតោ បាននិយាយ ដោយមានជំនឿចិត្តខ្ពស់ថាៈ ក្នុងឋានៈជាម្ចាស់ ក្បាច់គុន សម្រាប់ស៊ីហ្គេម ឆ្នាំ២០២៣ ខាងមុខនេះ កម្ពុជានឹងដាក់ ២១ វិញ្ញាសា ឲ្យប្រកួត។ លើ ២១ ប្រភេទ វិញ្ញាសានេះ រួមមានវិញ្ញាសាសម្តែង ទៅទម្រង់មេគុន ១២ ប្រភេទវិញ្ញាសា និងវិញ្ញាសាប្រយុទ្ធ មាន ៩ ប្រភេទទម្ងន់បុរស នារី ។

ល្បុក្កតោ ត្រូវបានធ្វើសមាហរណកម្ម ទៅតាមបណ្ដាប្រទេស ជាសមាជិកអាស៊ាន ដែលក្នុងនោះ មានឥណ្ឌូនេស៊ី ហ្វីលីពីន ឡាវ និងម៉ាឡេស៊ី។ ជាមួយនឹងគម្រោងរៀបចំ ការប្រកួតជើងឯកឆ្នាំ២០២២ ឲ្យបានឆាប់នោះ សហព័ន្ធកីឡាគុនល្បុក្កតោ ក៏មានគម្រោងរៀបចំ ការប្រកួតត្រៀមស៊ីហ្គេម (Pre- SEA Games) ហើយកម្ពុជា នឹងអញ្ជើញបណ្ដាប្រទេស ដែលជាសមាជិក មកចូលរួម ។

លោកអគ្គលេខាធិការរូបនេះ បានបង្ហាញពីឆន្ទៈ ចង់ឃើញប្រជាជនខ្មែរ ចាត់ទុកគុន ល្បុក្កតោ ជានិមិត្តរូប (Idol) ដូចកីឡាបាល់ទាត់ យ៉ាងអីចឹង ៕