Robert Lewandowski បានបរាជ័យក្នុងការដើរតួជាម៉ាស៊ីនរកគ្រាប់បាល់ឲ្យក្រុមអ្នកមានបុណ្យ FC Barcelona ដោយខកខានក្នុងស៊ុតបញ្ចូលទីសម្រាប់ការបង្ហាញខ្លួន ៤លើកចុងក្រោយរបស់គាត់ ប៉ុន្តែអ្នកចាត់ការលោក Xavi មើលទៅដូចជាមិនមានការព្រួយបារម្ភ ចំពោះទម្រង់លេងរបស់ខ្សែប្រយុទ្ធទាល់តែសោះ។

កីឡាករជម្រើសជាតិប៉ូឡូញមួយរូបនេះ ត្រូវបានគេរាប់បញ្ចូលថា ជាខ្សែប្រយុទ្ធមួយក្នុងចំណោមខ្សែប្រយុទ្ធមុតស្រួចជាទីបំផុត អស់រយៈកាលជាយូរលង់ណាស់មកហើយ ដោយក្លឹប Borussia Dortmund, Bayern Munich និង Barca សុទ្ធសឹងទទួលបានអត្ថប្រយោជន៍ពីទេពកោសល្យយ៉ាងច្រើនរបស់គាត់។ Lewandowski បានស៊ុតចូល ២៧គ្រាប់ នៅរដូវកាលនេះ នៅគ្រប់ការប្រកួតទាំងអស់ ប៉ុន្តែមានតែពីរប៉ុណ្ណោះក្នុង ១០ប្រកួតចុងក្រោយរបស់គាត់ ដែលបានបង្ហាញពីការធ្លាក់ចុះបន្តិចសម្រាប់ម្ចាស់ពាន FIFA Best Player ពីរសម័យកាល។

គ្រូបង្វឹក Barca លោក Xavi មិនមានការភ័យខ្លាចទេនៅពេលនិយាយអំពីទម្រង់លេងរបស់ Lewandowski ដោយកីឡាករវ័យ ៣៤ឆ្នាំនៅតែជាអ្នកស៊ុតបញ្ចូលទីនាំមុខគេនៅ La Liga ខណៈដែលក្រុមរបស់គាត់ក៏ខិតទៅជិតការឈ្នះពានលីកកំពូលអេស្ប៉ាញផងដែរ។ ចំពោះបញ្ហាដែលកើតមានសម្រាប់ប៉ា Ski មួយរយៈចុងក្រោយនេះ Xavi បាន​និយាយ​ថា​ “គាត់​បាន​ជោគជ័យ​ក្នុង​ផ្នែក​ធំ​នៃ​រដូវ​កាល​នេះ ឥឡូវ​មិន​ច្រើន​ទេ ប៉ុន្តែ​គ្រាប់បាល់ជាច្រើន​នឹង​មក​ដល់នាពេលខាងមុខ។ ខ្សែប្រយុទ្ធទាំងអស់សុទ្ធតែចង់រកគ្រាប់បាល់។ អ្នក​ដែល​មិន​បាន​ស៊ុតចូលគឺ​សោក​ស្តាយ វា​គឺ​ជា​ជីវិត​នៃខ្សែប្រយុទ្ធគ្រប់រូប។ គាត់ជាអ្នកស៊ុតបញ្ចូលទីច្រើនជាងគេក្នុងលីកជាមួយនឹង ១៧ គ្រាប់ ស្រមៃមើលថាតើអ្នកផ្សេងទៀតមានអារម្មណ៍យ៉ាងណា"៕