លោក Pep Guardiola និយាយថា កីឡាករ Manchester City របស់គាត់ប្រឈមការហត់នឿយជាខ្លាំង នៅពេលដែលគាត់បានបន្ទាបឱកាសរបស់ពួកគេ ក្នុងការឈ្នះពានរង្វាន់ធំៗបី នៅរដូវកាលនេះ។

ក្រុម​របស់​លោក Guardiola បាន​កក់​កៅអី​មួយ​ក្នុង​វគ្គ​បួន​ក្រុម​ចុង​ក្រោយ​ នៃ​ក្រប​ខ័ណ្ឌ Champions League នៅ​រដូវ​កាល​នេះ ហើយក៏ទើបតែបានបំបាក់ Sheffield United ដើម្បីឡើងទៅវគ្គផ្តាច់ព្រ័ត្រពាន FA Cup កាលពីពេលថ្មីៗនេះផង។ ក្តីសង្ឃឹមរបស់ Man City ក្នុងការរក្សាតំណែងជើងឯក Premier League បានទទួលការជំរុញកាលពីថ្ងៃសុក្រផងដែរ ខណៈដែលក្រុមកំពូលតារាង Arsenal បានស្មើជាមួយនឹងក្រុម Southampton ។ Man City អាចជាក្រុមដំបូងគេដែលអាចលើកពានធំៗអង់គ្លេស និងអឺរ៉ុបដំណាលគ្នាចាប់តាំងពី Manchester United ធ្វើវាក្នុងឆ្នាំ១៩៩៩ ប៉ុន្តែលោក Guardiola មានទុទិដ្ឋិនិយមចំពោះឱកាសរបស់ពួកគេក្នុងការធ្វើរឿងដ៏មហិមាបែបនេះ។

អ្នកចាត់ការសញ្ជាតិអេស្ប៉ាញរូបនេះបាននិយាយទៅកាន់អ្នកសារព័ត៌មាននៅពេលសួរថាតើក្រុមរបស់គាត់មានសមត្ថភាពលើកពាន 3 ក្នុងមួយរដូវកាលបានរឺទេ ដោយឲ្យដឹងថា "ខ្ញុំនឹងនិយាយជាមួយអ្នកអំពីវាបន្ទាប់ពីយើងបានឈ្នះ FA Cup និង Premier League ។ មុនពេលការប្រកួតវគ្គផ្តាច់ព្រ័ត្រនៃក្របខ័ណ្ឌ Champions League យើងនឹងចាប់ផ្តើមនិយាយអំពីលទ្ធភាពហើយក្រឡេកមើលថាវាឆ្ងាយប៉ុណ្ណា។ យើងនៅឆ្ងាយខ្លាំងណាស់ ហើយនៅក្នងប្រទេសមួយនេះមានតែក្រុមអ្នកជិតខាងមួយតែប៉ុណ្ណោះដែលអាចធ្វើបាន ហើយកំណត់ត្រានេះបានរក្សាមករាប់ទស្សវត្សមកហើយ"៕