អ្នកចាត់ការក្រុមអធិរាជស Real Madrid លោក Carlo Ancelotti បានធ្វើការរិះគន់ជាសាធារណៈ ចំពោះ អាជ្ញាធរបាល់ទាត់ពាក់ព័ន្ធនឹងបញ្ជី នៃការប្រកួត ដែលក្រុមរបស់លោកកំពុងតែប្រឈមមុខ។

Real Madrid ជាមធ្យមមួយប្រកួត រៀងរាល់បីថ្ងៃក្នុងរយៈពេល ៤សប្តាហ៍បន្ទាប់ ដោយក្រុម Los Blancos ប្រយុទ្ធទាំងក្នុងក្របខ័ណ្ឌ Champions League និង La Liga។ លោក Ancelotti បាន​ធ្វើ​ឱ្យ​គេ​ដឹង​ថា លោក​មិន​សប្បាយ​ចិត្ត​នឹង​ការ​ប្រកួត​ដែល​ក្រុម​របស់​លោក​កំពុង​ប្រឈម​មុខ​នោះ​ទេ។ 

លោក Ancelotti បាន​និយាយ​ក្នុង​សន្និសីទ​សារព័ត៌មាន​មួយ​ថា "កាលវិភាគការប្រកួតរបស់យើង​មិន​សម​ហេតុផល​ទេ​។ ការប្រកួតច្រើនពេក យើងត្រូវត្រួតពិនិត្យមើលសុខភាពរបស់កីឡាករ ពួកគេជាផ្នែកសំខាន់បំផុតនៃបាល់ទាត់ ប៉ុន្តែគ្រប់គ្នាគិតពីខ្លួនឯង លីកគិតពីខ្លួនឯង សហព័ន្ធគិតពីខ្លួនឯង FIFA គិត​ពី​ខ្លួន​ឯង UEFA គិត​តែ​ពី​ខ្លួន​ឯង វា​មិន​ល្អ​សម្រាប់​បាល់ទាត់ វា​មិន​ត្រឹម​ត្រូវ មាន​អ្វី​មួយ​ត្រូវ​ផ្លាស់​ប្តូរ ការប្រកួត​ច្រើន​ពេកហើយ"៕