រុស្ស៊ីត្រូវបានដកហូតសិទ្ធិពីការធ្វើជាម្ចាស់ផ្ទះវគ្គផ្តាច់ព្រ័ត្រ Champions League និងការប្រណាំងរថយន្ត Grand Prix
កីឡាអន្តរជាតិបានចាប់ផ្តើមបែរខ្នងដាក់រុស្ស៊ីជុំវិញការប្រតិបត្តិការយោធារបស់ខ្លួនចូលអ៊ុយក្រែនដោយព្រឹត្តិការណ៍កីឡាដ៏មានកិត្យានុភាពចំនួនពីរត្រូវបានដកហូតពីប្រទេសនេះកាលពីថ្ងៃសុក្រទី២៥កុម្ភៈ។
ការប្រកួតវគ្គផ្តាច់ព្រ័ត្រ Champions League នៅខែឧសភាត្រូវបានផ្លាស់ចេញពីទីក្រុងធំទីពីររបស់រុស្ស៊ីគឺសេនភីតធឺស្បឺក (St Petersburg) ទៅទីក្រុងប៉ារីសខណៈស្ថាប័នគ្រប់គ្រងកីឡាប្រណាំងយានយន្តពិភពលោក FIA បានប្រកាសថា ការប្រណាំងរថយន្ត Formula One Russian Grand Prix ខែកញ្ញាត្រូវបានលុបចោល។
ការសម្រេចចិត្តនេះត្រូវបានស្វាគមន៍ដោយរដ្ឋាភិបាលអង់គ្លេស ដោយរដ្ឋមន្ត្រីក្រសួងវប្បធម៌លោកស្រី ណាឌីន ដ័ររីស(Nadine Dorries) បាននិយាយថា “សាររបស់យើងគឺច្បាស់ណាស់ ៖រុស្ស៊ីមិនអាចធ្វើឱ្យស្របច្បាប់នូវការវាយប្រហារដ៏ឃោរឃៅ និងព្រៃផ្សៃរបស់ពួកគេលើអ៊ុយក្រែនដោយការធ្វើជាម្ចាស់ផ្ទះព្រឹត្តិការណ៍កីឡានិងវប្បធម៌អន្តរជាតិនោះទេ”។
គណៈកម្មាធិការអូឡាំពិកអន្តរជាតិក៏បានអំពាវនាវឱ្យសហព័ន្ធកីឡាពិភពលោកលុបចោលឬផ្លាស់ប្តូរទីតាំងព្រឹត្តិការណ៍នាពេលអនាគតដែលពួកគេគ្រោងនឹងរៀបចំឡើងនៅប្រទេសរុស្ស៊ីឬបេឡារូសផងដែរ។
ក្រុមបិសាចក្រហម Manchester Unitedបានបញ្ចប់ទំនាក់ទំនងពាណិជ្ជកម្មរបស់ពួកគេជាមួយក្រុមហ៊ុនអាកាសចរណ៍ជាតិរបស់រុស្ស៊ី Aeroflot ខណៈ UEFAត្រូវបានគេដឹងថាកំពុងពិភាក្សាជាមួយមេធាវីរបស់ខ្លួនអំពីរបៀបដែលខ្លួនអាចផ្តាច់ទំនាក់ទំនងជាមួយក្រុមហ៊ុនថាមពលរុស្ស៊ី Gazprom ដែលជាអ្នកឧបត្ថម្ភធំនៃក្របខ័ណ្ឌ Champions League ។
UEFA ត្រូវគេរំពឹងយ៉ាងទូលំទូលាយថានឹងផ្លាស់ប្តូរទីតាំងការប្រកួតដ៏មានកិត្យានុភាពរបស់ខ្លួនពីទីក្រុងសេនភីតធឺស្បឺកដែលជាទីក្រុងកំណើតរបស់ប្រធានាធិបតីរុស្ស៊ីលោក វ្ល៉ាឌីមៀរពូទីនបន្ទាប់ពីមានការលុកលុយយ៉ាងពេញទំហឹងរបស់រុស្ស៊ីលើអ៊ុយក្រែនកាលពីថ្ងៃព្រហស្បតិ៍ ហើយការផ្លាស់ប្តូរទៅកាន់កីឡដ្ឋាន Stade de Franceក្នុងទីក្រុងប៉ារីសត្រូវបានបញ្ជាក់នៅកិច្ចប្រជុំបន្ទាន់របស់គណៈកម្មាធិការប្រតិបត្តិកាលពីព្រឹកថ្ងៃសុក្រ។
សេចក្តីថ្លែងការណ៍របស់ស្ថាប័នគ្រប់គ្រងបាល់ទាត់អឺរ៉ុបនេះបាននិយាយថា “UEFA សូមថ្លែងអំណរគុណនិងដឹងគុណចំពោះប្រធានាធិបតីបារាំងអេមម៉ានុយអែលម៉ាក្រុងសម្រាប់ការគាំទ្រនិងការប្តេជ្ញាចិត្តផ្ទាល់ខ្លួនរបស់លោកដើម្បីឱ្យការប្រកួតដ៏មានកិត្យានុភាពបំផុតរបស់ក្លឹបបាល់ទាត់អឺរ៉ុបបានផ្លាស់ទៅប្រទេសបារាំងក្នុងពេលមានវិបត្តិ ដែលគ្មានអ្វីអាចប្រៀបផ្ទឹមបាននេះ”៕
ព័ត៌មានទាក់ទង
Real Madrid កំពុងកំណត់គោលដៅខ្សែការពារកណ្តាលរបស់បារាំង កីឡាករ William Saliba
ព្យាករណ៍គូ Manchester United vs Fulham
