អ្នកចាត់ការរបស់ក្លិបអធិរាជស Real Madrid លោក Carlo Ancelotti បានបង្ហើបថា គាត់បានទទួលអំណោយមិនធម្មតាពីអ្នកចាត់ការទូទៅរបស់ Liverpool លោក Jurgen Klopp អំឡុងពេលគាត់នៅដឹកនាំ Everton។

Klopp និង Ancelotti បានទទួលស្គាល់ការគោរពគ្នាទៅវិញទៅមកជាយូរយារណាស់មកហើយ ដោយអ្នកទាំងពីរបានសាទរចំពោះសមត្ថភាពគ្រប់គ្រងរបស់គ្នាទៅវិញទៅមក។ មុនពេលជំនួបរបស់ពួកគេក្នុងក្របខ័ណ្ឌ Champions League វគ្គ 16 ក្រុមចុងក្រោយជើងទី 1 នៅថ្ងៃអង្គារនេះ គ្រូបង្វឹកសញ្ជាតិអ៊ីតាលីរូបនេះបានបង្ហើបថាគាត់ថែមទាំងបានទទួលអំណោយពីគ្រូបង្វឹកហង្សក្រហមអំឡុងពេលគាត់នៅ Everton ទៀតផង។

ថ្លែងទៅកាន់ Sky Sports Italia លោក Ancelotti បាននិយាយថា "យើងមានទំនាក់ទំនងល្អ យើងបានចំណាយពេលមួយឆ្នាំកន្លះជាមួយគ្នានៅក្នុងទីក្រុង Liverpool អំឡុងពេលជំងឺកូវីដវាយលុក។ យើងបានផ្ញើសារ ហើយគាត់បានផ្តល់កាដូដល់ខ្ញុំ ហើយវាជាបារីអេឡិចត្រូនិច វាជាការពិត"៕