ខ្សែបម្រើ Martin Odegaard របស់ក្រុមកាំភ្លើងធំ Arsenal បាននិយាយលក្ខណៈបើកការអំពីការតស៊ូរបស់គាត់នៅ Real Madrid មុនពេលផ្លាស់មកកាន់ទីក្រុងឡុងដ៍ ដោយជោគជ័យ។

Odegaard បាន​ចុះ​ហត្ថលេខា​ឲ្យ Real Madrid ក្នុង​នាម​ជា​កីឡាករ​វ័យ ១៦ឆ្នាំ​កាល​ពី​ឆ្នាំ២០១៥ ចំ​ពេល​មាន​ការ​រំពឹង​ទុក​យ៉ាង​ខ្លាំង ក្នុងនាមជាយុវជនដែលមានសមត្ថភាពខ្ពស់ ប៉ុន្តែបានរកឃើញថា វាពិបាកក្នុងការបង្កើតការចាប់អារម្មណ៍ នៅក្នុងរដ្ឋធានីអេស្ប៉ាញទៅវិញ ដោយ Odegaard ត្រូវ​បាន​គេ​បញ្ជូន​ចេញ​ក្នុង​លក្ខខណ្ឌ​ខ្ចី​ជើង​បួន​ដង​ មុន​ចូល​រួម​ជាមួយ Arsenal ជា​អចិន្ត្រៃយ៍​ក្នុង​ឆ្នាំ២០២១។

កីឡាករសញ្ជាតិន័រវេរូបនេះ បានថ្លែងឲ្យដឹងថា "ខ្ញុំបានឈប់លេងតាមអ្វីដែលខ្ញុំលេង។ ខ្ញុំព្យាយាមធ្វើយ៉ាងណា មិនឲ្យមានកំហុសនៅលើទីលាន ហើយមិនសូវបានផ្តោតលើការប្រកួតនោះឡើយ។ កាលនោះខ្ញុំមានវ័យក្មេង តែពេលនេះទើបខ្ញុំដឹងថា យើងមិនបាច់ព្យាយាមលេងលាក់បាំងពេកទេ យើងត្រូវតែលេងតាមទម្រង់ដែលយើងធ្លាប់ប្រើប្រាស់ ហើយនេះជារឿងដែលខ្ញុំមិនបានធ្វើនៅ Real Madrid"៕