Real Madrid មានដំណើរការប្រកួតរង្គោះរង្គើ ហើយ​ទីបំផុត​ពួកគេ​បាន​ទទួល​បរាជ័យ​ជា​លើក​ដំបូង​ ក្នុង​ក្របខណ្ឌ La Liga ដោយ​ប្រកួតចាញ់​ Rayo Vallecano កាលពី​ថ្ងៃ​ចន្ទ។ ពួក​គេ​នឹង​សម្លឹង​រក​ការ​ត្រឡប់យកជ័យជម្នះ​មក​វិញ​ នៅ​ពេល​ដែល​ពួក​គេត្រូវ​ធ្វើ​ជា​ម្ចាស់​ផ្ទះពេលប៉ះជាមួយ Cadiz នៅ​ថ្ងៃ​ព្រហស្បតិ៍នេះ​។

លទ្ធផល​នៃ​ការប្រកួត​ចាញ់​នោះ​បានធ្វើឱ្យ Real Madrid​ បច្ចុប្បន្ន​ធ្លាក់​មក​ឈរ​នៅ​លេខទី​២ មាន៣២​ពិន្ទុ ដោយ​តាម​ពី​ក្រោយ​ក្រុម​កំពូល​តារាង Barcelona ចំនួន២​ពិន្ទុ។ ផ្ទុយពីនេះវិញ​Cadiz ឈរនៅលេខរៀងទី២ ពីបាតតារាងដោយមាន១១ពិន្ទុ។

តំបន់​មួយ​ដែល​ធ្វើ​ឱ្យ​ Real Madrid ​មាន​ការព្រួយបារម្ភខ្លាំង ​គឺ​តំបន់​ការពារ ហើយប្រហែលជាពិបាកក្នុងតំបន់ប្រយុទ្ធ​ ព្រោះកីឡាករ​សំខាន់​ Karim Benzema ត្រូវ​របួស។​ ក្រុមយក្សរបស់អេស្ប៉ាញ នឹងរីករាយក្នុងការស្វាគមន៍ការត្រលប់មកវិញរបស់ Toni Kroos ដែលត្រូវបានបំរុងសម្រាប់ការប្រកួតជាមួយ Rayo ប៉ុន្តែ Antonio Rudiger ត្រូវអវត្តមានមិនបានចូលរួមការប្រកួតនេះ ដោយសារត្រូវរបួស។ 

Cadiz ធ្វើមិនបានល្អប៉ុន្មាននោះទេ ពួក​គេ​ចូល​មក​ក្នុង​ការ​ប្រកួត​នេះ​ ជាមួយ​នឹង​ការប្រកួត​ឈ្នះ​តែ​១ប្រកួតគត់ ក្នុង​ចំណោមការ​ប្រកួត​៧លើក​ចុង​ក្រោយ​។ ទោះ​ជា​យ៉ាង​ណាក៏ដោយ​ ពួក​គេ​ប្រកួតចាញ់​តែ​១ប្រកួត​គត់​ ក្នុង​ការ​ប្រកួត​ទាំង​៧នោះ។ 

ក្នុង​ជំនួបរវាងក្រុមទាំងពីរ​ ការប្រកួត៣ក្នុង​ចំណោម​​ ៥​ប្រកួតចុង​ក្រោយ​ ក្រុម​ទាំង​ពីរ​បាន​ស៊ុត​បាល់​បញ្ចូល​ទីគ្នាទៅវិញទៅមក ប៉ុន្តែ​នៅ​ក្រៅ​ដី Cadiz មិន​បានទទួលជ័យជម្នះទាល់តែសោះ​ ក្នុង​ជំនួប៣ប្រកួត​ចុង​ក្រោយ​នេះ។

ការព្យាករណ៍​ :​​ នៅក្នុងជំនួបថ្មីរវាងពួកគេ Cadiz បានបិទ Real Madrid ហើយពួក​គេ​មិន​បានប្រកួតចាញ់នោះទេ​ ក្នុង​២ប្រកួតចុង​ក្រោយ ហើយប្រកួត​ចាញ់​ ​Real Madrid តែ​មួយប្រកួតគត់​ ក្នុង​ការប៉ះគ្នា៥ប្រកួត​ចុង​ក្រោយ។​ ក្រុមទាំងពីរបានស៊ុតបញ្ចូលទី ក្នុងការប្រកួតចំនួន៣ ក្នុងចំណោម៥ប្រកួតចុងក្រោយ ហើយក៏ដូចគ្នាទៅនឹង​ Real Madrid ផងដែរ។ ដោយសារដំណើរការប្រកួតរបស់ភាគីទាំងពីរ មុននឹងចូលមកក្នុងការប្រកួតនេះ យើងជឿជាក់ថាក្រុមទាំងពីរ នឹងមានការស៊ុតបញ្ចូលទីទៅវិញទៅមក ហើយជ័យជម្នះនឹងបានទៅលើ Real Madrid៕