ទើបតែពីរប្រកួតក្នុងរដូវកាលថ្មី Premier League ធ្វើឱ្យលោក ​Jurgen Klopp មានការព្រួយបារម្ភ ជាច្រើនរួចទៅហើយ។

មិនមែនជាបញ្ហាអ្វីនោះទេរបស់ Liverpool ដោយលទ្ធផលស្មើជាមួយ​នឹង Fulham និង Crystal Palace ជាលើកដំបូង ដែលពួកគេបានបរាជ័យក្នុងការឈ្នះការប្រកួតបើកឆាកលីកចំនួនពីរលើកបែបនេះ ចាប់តាំងពីរដូវកាល២០១២-១៣​ តែអ្វីដែលត្រូវខ្វាយខ្វល់នោះ គឺបញ្ហារបួសដែលធ្វើឱ្យគ្រូបង្វឹកក្រុមហង្សក្រហម មានការព្រួយបារម្ភ។

Joel Matip និង Roberto Firmino គឺជាកីឡាករចុងក្រោយគេ ដែលត្រូវបានដកចេញពីក្រុម ដោយពួកគេទាំងពីរបានអវត្តមាន ក្នុងការប្រកួតជាមួយនឹង Palace កាលពីថ្ងៃចន្ទ ដោយចូលរួមជាមួយកីឡាករផ្សេងទៀង​ Thiago Alcantara, Diogo Jota, Alex Oxlade-Chamberlain និង Curtis Jones ដើម្បីព្យាបាល។

ជាមួយនឹងកីឡាករ Darwin Nunez បានបន្ថែមបញ្ហាឱ្យទៅលោក Klopp ដោយត្រូវបានទទួលកាតក្រហម ដែលធ្វើឱ្យមានការព្យួរបីប្រកួតទៀតនោះ ក្រុមហង្សក្រហមមើលទៅហាក់ដូចជាបាត់បង់កីឡាករច្រើនណាស់៕