Paulo Dybala បានចុះហត្ថលេខាជាមួយនិង​ Roma ក្នុងលក្ខខណ្ឌការផ្ទេរដោយឥតគិតថ្លៃ ដោយខ្សែប្រយុទ្ធសញ្ជាតិអាហ្សង់ទីន បានសម្រេចចិត្តចូលរួមជាមួយ Jose Mourinho នៅ Stadio Olimpico បន្ទាប់ពីមានមន្ទិលសង្ស័យជាច្រើនខែអំពីអនាគតរបស់គាត់។

អាជីពរយៈពេលប្រាំពីរឆ្នាំរបស់ Dybala នៅ Juventus បានបញ្ចប់បន្ទាប់ពីផុតកំណត់ នៃកិច្ចសន្យារបស់គាត់កាលពីខែមិថុនា ប៉ុន្តែបច្ចុប្បន្ននេះ គាត់នឹងបន្តលេងនៅក្នុងប្រទេសអ៊ីតាលីជាមួយ Roma ។

អ្នកគាំទ្រក្រុម Roma នឹងសង្ឃឹមថា Dybala អាចនាំក្រុមរបស់លោក Mourinho ទៅកាន់កម្រិតដ៏ល្អមួយសម្រាប់រដូវកាលឆ្នាំ២០២២-២៣ ដោយគ្រូបង្វឹកសញ្ជាតិព័រទុយហ្គាល់មានគោលដៅនាំក្លឹបត្រលប់ទៅកាន់ការ្បរកួត Champions League វិញ បន្ទាប់ពីជោគជ័យក្នុង Europa Conference League កាលពីរដូវកាលមុន។

ក្លឹបកំពូលៗជាច្រើនបានទាក់ទងជាមួយ Dybala កាលពីដើមឆ្នាំនេះ រួមមានក្រុម Arsenal, Chelsea, Manchester United និង Tottenham ។​ Inter, Paris Saint-Germain, Barcelona, ​​Milan និង Bayern Munich ក៏បានទាក់ទងជាមួយនឹងកីឡាករវ័យ ២៨ឆ្នាំរូបនេះផងដែរ ប៉ុន្តែ Mourinho បានបញ្ចុះបញ្ចូលគាត់ដោយជោគជ័យថា Roma គឺជាកន្លែងដ៏ល្អបំផុតសម្រាប់គាត់ដើម្បីបន្តអាជីពរបស់គាត់៕