អតីតតារាឆ្នើមរបស់ក្លឹបកាំភ្លើងធំ Arsenal បានបញ្ចប់កិច្ចសន្យារបស់គាត់ ជាមួយនឹងក្លឹប Fenerbahce ប៉ុន្តែនឹងនៅតែបន្តអាជីពរបស់គាត់ នៅក្នុងក្របខ័ណ្ឌ Super Lig។ 

Fenerbahce បានប្រកាសពីការចាកចេញរបស់កីឡាករ​ Ozil នៅក្នុងសេចក្តីថ្លែងការណ៍មួយថា "វាត្រូវបានយល់ព្រមថា កិច្ចសន្យារវាងក្លឹបរបស់យើង និង Mesut Ozil នឹងត្រូវបានបញ្ចប់ ដោយការព្រមព្រៀងគ្នាទៅវិញទៅមក... យើងសូមជូនពរឱ្យ Mesut Ozil ទទួលបានជោគជ័យ សម្រាប់អាជីពរបស់គាត់បន្តទៀត" ។

Mesut Ozil ត្រូវបានកំណត់ថា នឹងចូលរួមជាមួយ İstanbul Basaksehir បន្ទាប់ពីកិច្ចសន្យារបស់គាត់ នៅ Fenerbahce ត្រូវបញ្ចប់។ ខ្សែបម្រើរូបនេះ ត្រូវបានចាកចេញពីក្រុម Fenerbahce ដោយសារតែមានបញ្ហាជាមួយគ្រូបង្វឹក Ismail Kartal អ្វីគ្រប់យ៉ាង ត្រូវបានបញ្ជាក់កាលពីថ្ងៃពុធ ដោយគាត់បានចាកចេញពីក្លឹបហើយ។

Basaksehir មានចំណាប់អារម្មណ៍ក្នុងការចុះហត្ថលេខាលើកីឡាករអន្តរជាតិរបស់អាឡឺម៉ង់ ហើយក្លឹបបានប្រកាសអំពីការផ្ទេរនាពេលខាងមុខ៕